New Myanmar Foundation ၏ နယူးမြန်မာ တယ်လီကျန်းမာ အစီအစဉ်ကို ဇွန်လ (၁) မှ စတင်ဖွင့်လှစ်ခဲ့ပါသည်။ ဖွင့်လှစ်ခဲ့ရသော ရည်ရွယ်ချက်မှာ ထိုင်းနိုင်ငံ၊ မဲဆောက်မြို့သို့ တိမ်းရှောင်ခိုလှုံလာကြသည့် သိန်းနှင့်ချီသော လူ့အခွင့်အရေးနှင့် ဒီမိုကရေစီရေးတက်ကြွ လှုပ်ရှားသူများ၊ စစ်ဘေးရှောင် ပြည်သူများနှင့် ရွှေ့ပြောင်းလုပ်သားများ၏ ကျန်းမာရေးကို ကာကွယ်စောင့်ရှောက်ပေးရန် ဖြစ်ပါသည်။ ၎င်းတို့အနေဖြင့် ကျန်းမာရေး ချို့တဲ့မှုများ၊ အရေးပေါ် အခြေအနေများနှင့် ကြုံတွေ့လာသည့်အခါတွင် လိုအပ်သည့် ကျန်းမာရေးစောင့်ရှောက်မှုများ ရရှိနိင်ရန်အတွက် အခက်အခဲ အဟန့်အတားများစွာ ကြုံတွေ့ရပါသည်။ ဘာသာစကားအခက်အခဲ၊ သွားလာရေးအခက် အခဲ၊ ငွေကြေးချို့တဲ့မှု၊ သတင်းအချက်အလက်ချို့တဲ့မှုနှင့် အဖမ်းအဆီးခံရနိုင်သည့် အခြေအနေများ အပါအဝင်များစွာသော အတား အဆီးများ ရှိနေပါသည်။

၎င်းအခက်အခဲများကို ကူညီဖြေရှင်းပေးနိုင်ရန်အတွက် Tele Health (တယ်လီဖုန်းဖြင့် Telegram Application သုံးကာ လူနာအား ကြည့်ရှုစစ်ဆေးကာ အကြံဉာဏ်ပေးခြင်းနှင့် ဖြစ်နိုင်ပါက ကုသမှုပေးခြင်း) အစီအစဉ်ကို ဇွန်လ (၁)ရက် ၂၀၂၂ တွင် စတင်ခဲ့ပါသည်။ Tele Health အစီအစဉ်တွင် ပြည်တွင်း၊ ပြည်ပမှ အထူးကု (၁၂) ဦးပါသော ဆရာဝန် (၂၄) ဦးအဖွဲ့မှ မေတ္တာဖြင့် ကူညီပေးနေပြီး မနက် (၆) နာရီမှ ည (၁၂) နာရီ အထိ ပိတ်ရက်မရှိ ဖွင့်လှစ်ပေးထားပါသည်။ ကျန်းမာရေး အခက်အခဲရှိသော လူနာများအနေဖြင့် အချိန်မရွေး အခမဲ့ ပြသနိုင်ပြီး မယ်တော်ဆေးခန်းနှင့် ချိတ်ဆက်ထားသည့်အတွက် လိုအပ်ပါက သွေးစစ်ခြင်း၊ ဓါတ်မှန်ရိုက်ခြင်း၊ Ultrasound ရိုက်ခြင်းများကိုလည်း အဆင်ပြေပြေ ဆောင်ရွက်နိုင်ပါသည်။ သို့သော် အိမ်တိုင်ယာရောက် ကြည့်ရှုကုသပေးခြင်း၊ ဆေးပေးခြင်းများကိုဆောင်ရွက်ပေးနိုင်ခြင်း မရှိသေးပါ။ ဇွန်လ (၁) ရက်နေ့မှစ၍ သြဂုတ်လ (၃၀) ရက်နေ့အထိ ကူညီပေးခဲ့သူပေါင်း (၁၂၅) ဦးရှိခဲ့ရာ ၎င်း တို့ထဲတွင် အမျိုးသား (၂၉)ဦး၊ အမျိုးသမီး (၅၆) ဦးနှင့် ကလေးသူငယ်ပေါင်း (၄၀)ဦး ပါဝင်ပါသည်။ ဆွေးနွေးအကြံပေး ကုသပေးနိုင်ခဲ့သော လူနာများမှာ အများအားဖြင့် အထွေထွေရောဂါ လူနာများဖြစ်ပြီး အထွေထွေလူနာ (၄၀)ဦး၊ ကလေးရောဂါလူနာ (၃၄) ဦး၊ ထိခိုက်ဒဏ်ရာနှင့် အရိုးရောဂါလူနာ (၂၀) ဦး၊ အမျိုးသမီးရောဂါလူနာ (၉) ဦး၊ အရေပြားရောဂါလူနာ (၆) ဦး၊ နား၊ နှာခေါင်း၊ လည်ချောင်းနှင့် ဆိုင်သောလူနာ (၅) ဦးနှင့် အခြားရောဂါ လူနာပေါင်း (၁၁) ဦးတို့ ဖြစ်ကြပါသည်။ Online က ကြည့်ရှုကုသရုံနှင့် မရဘဲ အခြားစစ်ဆေးမှု၊ ကုသမှု လိုအပ်သောလူနာ (၁၅) ဦးကိုလည်း မယ်တော်ဆေးခန်းသို့ အချိန်မှီ လွှဲပို့နိုင်ခဲ့ပြီးဖြစ်ပါသည်။

မဲဆောက်ရောက် ဒီမိုကရေစီ အင်အားစုများ အနေဖြင့် အခကြေးငွေကုန်ကျခြင်းမရှိဘဲ မြန်မာဆရာဝန်များနှင့် တိုင်ပင်ဆွေးနွေးလိုပါက မနက် (၆) နာရီမှ ည (၁၂) နာရီအတွင်း ဖုန်းနံပါတ် (+66971985803) သို့ ဖုန်းဆက်၍ ဖြစ်စေ Telegram မှ တစ်ဆင့်ဖြစ်စေဆက်သွယ်နိုင်ပါသည်။