New Myanmar Foundation မှ ဦးစီးကျင်းပပြုလုပ်သော (၁၀) ရက်ကြာ ဖွင့်လှစ်မည့် အခမဲ့ အခြေခံလျှပ်စစ် မော်တာစက်ချုပ်သင်တန်း အပတ်စဉ်-(၂၉) သင်တန်းဖွင့်ပွဲ ကို (၃-၈-၂၀၂၃) ရက်နေ့တွင် ထိုင်း-မြန်မာနယ်စပ်ဒေသရှိ Women Lead Resource Center တွင် ကျင်းပ ပြုလုပ်ခဲ့ပါသည်။
ဦးစွာ ပထမ New Myanmar Foundation ၏ တာဝန်ခံဖြစ်သူ ဒေါက်တာစန်းအောင်မှ သင်တန်းသားများ၏အလုပ်လုပ်ချင်သည့်စိတ်နှင့် ယခုလို စက်ချုပ်သင်တန်းတက်ရောက်ရန် ရောက်ရှိလာကြခြင်းအား ကြိုဆိုကြောင်း၊ မိမိရောက်ရှိနေသည့်နေရာမှာ မဆုတ်မနစ်ကြိုးစားနေကြသည်ကိုတွေ့ရသည့်အတွက် ဂုဏ်ယူကြောင်းပြောကြားပြီး Foundation ၏ ကူညီဆောင်ရွက်နေမှုများနှင့် ရယူနိုင်သောအခွင့်အလမ်းများကို ရှင်းပြပေးပြီး စနစ်တကျရယူနိုင်ပါကြောင်း ပြောကြား၍ အားပေးကြိုဆိုခဲ့ပါသည်။
ဆက်လက်၍ သင်တန်း တာဝန်ခံ NLD – ဧရာဝတီတိုင်း တွဲဖက် အတွင်းရေးမှူး ဒေါ်ခင်လှဌေးမှ အခမဲ့ အခြေခံလျှပ်စစ် မော်တာစက်ချုပ်သင်တန်း ဖွင့်လှစ်ပေးရခြင်း၏ ရည်ရွယ်ချက်နှင့် ရောက်ရှိလာကြသော သင်တန်းသူ / သား (၆)ဦး အား ကြိုဆိုကြောင်း ၊ သင်တန်းသို့ရောက်ရှိလာသူအချင်းချင်း ညီအစ်ကို မောင်နှမစိတ်ဓာတ်ဖြင့် တစ်ဦးနှင့် တစ်ဦးကူညီစောင့်ရှောက်ကြရန်၊ အချင်းချင်းဗဟုသုတများ မျှဝေရင်း စည်းကမ်းလိုက်နာပြီး စနစ်တကျနေထိုင်ကြစေလိုကြောင်း၊ အလုပ်အကိုင်ရရှိစေရန် အတတ်နိုင်ဆုံး ကူညီပေးသွားမည်ဖြစ်ကြောင်း ပြောကြားခဲ့ပါသည်။
ထို့နောက် သင်တန်းသားများမှ တစ်ဦးချင်းမိတ်ဆက်စကားများ ပြောကြား၍ အခမ်းအနားအား အောင်မြင်စွာ ရုတ်သိမ်းခဲ့ပါသည်။
New Myanmar Foundation အနေဖြင့် ယခုဖွင့်လှစ်သည့် အခမဲ့အခြေခံ လျှပ်စစ် မော်တာစက်ချုပ်သင်တန်းတွင် စက်ချုပ်ပညာရပ်သာမ က လူ့အခွင့်အရေး၊ အလုပ်သမားအခွင့်အရေး၊ အမျိုးသမီးအခွင့်အရေး၊ ရွှေ့ပြောင်းအလုပ်သမား အခွင့်အရေး အစရှိသည့် အသိပညာရပ်များကိုလည်း ဝေမျှပေးသွားမည် ဖြစ်ပါသည်။
