၂၀၂၅ ခုနှစ်၊ ဧပြီလ (၂၃) ရက်နေ့ မှ မေလ (၂) ရက်အထိ (၇) ရက်ကြာ ဖွင့်လှစ်သင်ကြားပေးခဲ့သော နယူးမြန်မာ ဖောင်ဒေးရှင်း (New Myanmar Foundation) ၏ အခမဲ့အခြေခံကွန်ပျုတာသင်တန်း အပတ်စဉ် (၁) သင်တန်းဆင်းပွဲ အခမ်းအနား ကို ၂၀၂၅ ခုနှစ်၊ မေလ (၂) ရက်နေ့ ညနေ (၀၄ : ၀၀) နာရီတွင် ထိုင်း-မြန်မာနယ်စပ် ဒေသရှိ နယူးမြန်မာ ဖောင်ဒေးရှင်း၏ ကွန်ပျုတာသင်တန်းခန်းမတွင် ကျင်းပပြုလုပ်ခဲ့ပါသည်။
အခြေခံကွန်ပျုတာသင်တန်း အပတ်စဉ် (၁) ကို တက်ရောက်အောင်မြင်ခဲ့သည့် သင်တန်းသူ စုစုပေါင်း (၁၀) ဦး ရှိပါသည်။ သင်တန်းဆရာ ကိုဝီရ မှ သင်တန်းသား/သူများအား သင်တန်းပြီးဆုံး သွားသော်လည်း မိမိတို့အချင်းချင်း ညီအစ်ကိုမောင်နှမ အရင်းသဖွယ် ရှေ့ဆက်ခင်မင်သွားကြပြီး တစ်ဦးနှင့်တစ်ဦး ကူညီရိုင်းပင်းကြရန်နှင့် ကွန်ပျုတာ ပညာရပ်နှင့် ပတ်သတ်၍ လိုအပ်လာပါကလည်း ဆရာထံ အကူအညီတောင်းခံနိုင်ပါကြောင်း၊ မဲဆောက်ရောက် မြန်မာပြည်သူများအတွက်လည်း မိမိတို့ တတ်မြောက်ထားသည့် ပညာရပ်များဖြင့် ပြန်လည်အကျိုးပြုကြစေလို ကြောင်းနှင့် လုပ်ငန်းခွင်သို့ ဝင်ရောက်သည့်အခါတွင်လည်း ကြိုးစားပြီး ဖြစ်ဖြစ်မြောက်မြောက်ထိထိရောက်ရောက် လုပ်စေ လိုကြောင်း တို့ကို ပြောကြားခဲ့ပါသည်။
ထို့နောက် သင်တန်းသား၊ သင်တန်းသူများ သိရှိလိုသော မေးခွန်းများကို ပြန်လည်ဖြေကြားပေးခဲ့သည်။ နောက်ဆုံးအနေဖြင့် သင်တန်းသားများအနေဖြင့် သင်တန်းပြီးဆုံးသွားသော်လည်း သင်တန်းသား၊ သင်တန်းသူများအချင်းချင်း မိသားစုဝင်များကဲ့သို့ တစ်ဦးနှင့်တစ်ဦး စည်းစည်းလုံးလုံးရှိကာ တစ်ဦး၏ လိုအပ်ချက်ကို တစ်ဦးက ကူညီရိုင်းပင်းကြရန်နှင့် အကူအညီလိုအပ်ပါကလည်း အချိန်မရွေး ဆက်သွယ်မေးမြန်း နိုင်ကြောင်း၊ သင်တန်းသားသင်တန်းသူတို့၏ အကြံပြုချက်များအတွက်ကျေးဇူးတင်ကြောင်းနှင့် ထိုအကြံပြုချက်များ ကိုလည်း တက်နိုင်သလောက် ကြိုးစားပြီးလုပ်ဆောင်ပေးသွားမည် ဖြစ်ကြောင်း ပြောကြားခဲ့ပါသည်။ အဆိုပါတင်ပြဆွေးနွေးမှုများအပြီးတွင် သင်တန်းသူ (၁၀) ဦး တို့အား သင်တန်းဆင်းလက်မှတ်များ ပေးအပ်ခဲ့ပြီး အမှတ်တရဓါတ်ပုံများ ရိုက်ကူးကာ သင်တန်းဆင်းပွဲကို အောင်မြင်စွာပိတ်သိမ်းခဲ့ပါသည်။
