၂၀၂၄ ခုနှစ် ဩဂုတ်လ (၅) ရက်နေ့ မှ (၁၇) ရက်အထိ (၁၂) ကြာ ဖွင့်လှစ်သင်ကြားပေးခဲ့သော New Myanmar Foundation ၏ အခမဲ့ အခြေခံလျှပ်စစ်မော်တာစက်ချုပ်သင်တန်း အပတ်စဉ် (၄၁) သင်တန်းဆင်းပွဲ အခမ်းအနား ကို ၂၀၂၄ ခုနှစ်၊ ဩဂုတ်လ (၁၇) ရက်နေ့ နံနက် (၁၀) နာရီတွင် ထိုင်း-မြန်မာနယ်စပ်ဒေသရှိ နယူးမြန်မာ ဖောင်ဒေးရှင်း၏ Sewing Machine Training Center တွင် ကျင်းပပြုလုပ်ခဲ့ပါသည်။
အခြေခံစက်ချုပ်သင်တန်း အပတ်စဉ် (၄၁) ကို တက်ရောက်အောင်မြင်ခဲ့သည့် သင်တန်းသား၊ သင်တန်းသူ စုစုပေါင်း (၁၁) ဦး (သင်တန်းသား (၅) ဦး နှင့် သင်တန်းသူ (၆) ဦး) ရှိပါသည်။
သင်တန်းဆင်းပွဲတွင် ဦးစွာပထမ New Myanmar Foundation ၏ Executive Director Dr. Sann Aung မှ သင်တန်းအဆုံးထိ တစိုက်မတ်မတ် ကြိုးစားသင်ယူခဲ့ကြသော သင်တန်းသား၊ သင်တန်းသူများကို ချီးကျူး ဂုဏ်ပြုပါကြောင်း၊ သင်တန်းပြီးဆုံးသွားသော်လည်း သင်တန်းဆရာမနှင့်ဖြစ်စေ၊ သင်တန်းသား အချင်းချင်းဖြစ်စေ အဆက်အသွယ်မပြတ်စေပဲ အကူအညီလိုအပ်ပါက တစ်ဦးနှင့်တစ်ဦး အပြန်အလှန် ကူညီပေးနိုင်အောင် ကြိုးစားကြစေလိုကြောင်း၊ ယခုစက်ချုပ် သင်တန်းသည် ပညာရပ်တစ်ခုအနေဖြင့် သာမက ချိတ်ဆက်နိုင်သော Network များကိုပါ ချိတ်ဆက်ပြုလုပ်ပေးနိုင်သည့်အတွက် သင်တန်းပြီးဆုံးသွားသော်လည်း အခက်အခဲ တစ်စုံတစ်ရာရှိပါက New Myanmar Foundation မှ ကူညီပေးရန် အသင့်ရှိနေကြောင်း၊ အလုပ်အကိုင်အခွင့်အလမ်းများအတွက်လည်း ကြိုးစားရှာဖွေပေးသွားမည်ဖြစ်ကြောင်း၊ သင်တန်းသူများ အနေဖြင့် မိမိတို့ရောက်ရှိနေသည့်နေရာတွင် မိမိခြေထောက်ပေါ်မိမိရပ်တည်နိုင်ရန် ကြိုးစားသင့်ကြောင်း၊ မိမိတို့အနေဖြင့်လည်း အကောင်းဆုံး ကူညီပံ့ပိုးပေးသွားမည်ဖြစ်ကြောင်း ပြောကြားခဲ့ပါသည်။
ဆက်လက်၍ သင်တန်းဆရာမမေသန္တာလှိုင် မှ အခမဲ့ အခြေခံ မော်တာစက်ချုပ်သင်တန်း အပတ်စဉ် (၄၁) အား သင်တန်းအစမှ ပြီးဆုံးသည်အထိ ကြိုးကြိုးစားစား အောင်မြင်အောင် တက်ရောက်ခဲ့ကြသော သင်တန်းသူများ အား ကျေးဇူးတင်ရှိပါကြောင်း၊ New Myanmar Foundation ဘက်မှလည်း တတ်နိုင်သ၍ ကူညီပေးသွားမည် ဖြစ်ကြောင်း၊ သင်တန်းပြီးဆုံးသွားသော်လည်း သင်တန်းသူများအချင်းချင်း ညီအစ်ကိုမောင်နှမ အရင်းသဖွယ် ရှေ့ဆက် ခင်မင်သွားကြပြီး တစ်ဦးနှင့်တစ်ဦး ကူညီရိုင်းပင်းကြရန်နှင့် သင်တန်းသား/သူ များအနေဖြင့် စက်ချုပ်
ပညာရပ်နှင့် ပတ်သတ်၍ လိုအပ်လာပါကလည်း ဆရာမများထံ အကူအညီ တောင်းခံနိုင်ပါကြောင်း၊ မဲဆောက်ရောက် မြန်မာပြည်သူများအတွက်လည်း မိမိတို့ တတ်မြောက်ထားသည့် ပညာရပ်များဖြင့် ပြန်လည် အကျိုးပြုကြစေ လိုကြောင်း နှင့် နောင်တစ်ချိန်တွင် သင်တန်းသားများကိုယ်တိုင် စက်ချုပ်သင်တန်း များ ပြန်လည်ပို့ချနိုင်သည်အထိ ဆက်လက်ကြိုးပမ်းအားထုတ်သွားစေလိုကြောင်း နှင့် အလုပ်အကိုင် ကြိုးစားရှာဖွေကြရန် တို့ကို ပြောကြားခဲ့ပါသည်။
ထို့နောက် ဆရာသန်းမြင့်အောင်မှလည်း သင်တန်းတက်ရောက်လာသော သင်တန်းသား၊ သင်တန်းသူများကို ကြိုဆိုပါကြောင်း၊ သင်တန်းကာလအတွင်း ဆရာမများ၏ သင်ကြားမှုများအား ကြိုးစားသင်ယူရန်၊ မိသားစုဝင်များကဲ့သို့အချင်းချင်း စည်းစည်းလုံးလုံးနဲ့ ကြိုးစားလေ့လာစေချင်ကြောင်း၊ သင်တန်းပြီးဆုံး ပါကလည်း အလုပ်အကိုင်များရရှိ ရန်အတွက်လည်း ချိတ်ဆက်ပေးသွားမည် ဖြစ်ကြောင်း၊ အကူအညီလိုအပ်ပါ ကလည်း အချိန်မရွေးဆက်သွယ် မေးမြန်းနိုင်ကြောင်းတို့အား ပြောကြားခဲ့ပါသည်။
ဆရာ/ဆရာမများ၏ ပြောကြားမှုများအပြီးတွင် သင်တန်းသူ/ သင်တန်းသား တစ်ဦးချင်းစီမှ သင်တန်း၏ အားသာချက်/အားနည်းချက်များ နှင့် ကြုံတွေ့ရသော အခက်အခဲများ၊ ကျေနပ်ပီတိစကားများကို မျှဝေခဲ့ ကြပါသည်။ အဆိုပါတင်ပြဆွေးနွေးမှုများအပြီးတွင် သင်တန်းသား/သူ (၁၂) ဦး တို့အား သင်တန်းဆင်း လက်မှတ်များပေးအပ်ခဲ့ပြီး အမှတ်တရဓါတ်ပုံများ ရိုက်ကူးကာ သင်တန်းဆင်းပွဲကို အောင်မြင်စွာ ပိတ်သိမ်းခဲ့ပါသည်။
အခမဲ့ အခြေခံလျှပ်စစ် မော်တာစက်ချုပ်သင်တန်း အပတ်စဉ်-(၄၁) သင်တန်းတွင် စက်ချုပ်ပညာသာမက ထိုင်းနိုင်ငံ၏ ရွှေ့ပြောင်းလုပ်သားများအတွက် အလုပ်သမားကာကွယ်စောင့်ရှောက်ရေး ဥပဒေသင်တန်း၊ အလုပ်ရှင် နှင့် အလုပ်သမားများကြား ဖြစ်တတ်သောပြဿနာများနှင့် ဖြေရှင်းရန်နည်းလမ်းများ၊ စက်ရုံအလုပ်ရုံများတွင် အလုပ်လုပ်ကိုင်စဉ်အတွင်း မတရားသဖြင့်ခိုင်းစေခံရခြင်း၊ ညှဉ်းပမ်းနှိပ်စက်ခြင်း၊ ခေါင်းပုံဖြတ်ခံရခြင်း၊ လုပ်ခလစာများ အပြည့်အဝမရရှိခြင်း အစရှိသည်တို့ ဖြစ်ပွားခဲ့ပါက တိုင်ကြား ဆက်သွယ်နိုင်မည့် နည်းလမ်းများကိုလည်း မျှဝေပေးနိုင်ခဲ့ပါသည်။
